Let’s travel together.

Wisata Baturaden

8

Bayumas – Kabupaten Bayumas salah siji Kabupaten nang Provinsi Jawa Tengah, lan termasuk salah sijine wilayah sing nganggo basa Ngapak. Kabupaten Banyumas diapit kabupaten-kabupaten liane, nang iring lor mandan ngetan ana Kabupaten Purbalingga, nant iring kidul madan ngetan ana Kabupaten Banjarnegara, iring ngidul maning ana Kabupaten Cilacap, iring kulon ana Kabupaten Brebes, lan iring lor ana Kabupaten Pemalang.

Wisata Baturaden

Nang Kabupaten ana pirang-pirang panggonan, kaya kuliner, hiburan, tempat belanja, lan ora kalah juga ana tempat wisata. Tempat wisata sing terkenal nang Kabupaten Banyumas salah sijine ya kue tempat wisata Baturaden.

Wisata Baturaden kue anane nang iring lor Kota Purwokerto, lewih tepate nang lereng Gunung Slamet. Sing jenenge lereng gunung biasane hawane adem tur asri, banyu kaline esih bening-bening pisan, lan wit-witan tukul subur ijo-ijo lan gede gede. Wisata Baturaden cocok banget nggo wisata relaksasi, sing wis pada putek nggal dina ngode, butuh hiburan sing ngademna pikiran ora nambaih pikiran.

Pancuran Pitu

Pancuran Pitu

Nang Wisata Baturaden ora mung siji utawa loro tok nggon wisatane, salah sijine sing paling terkenal ya kue Pancuran Pitu, sing ana pemandian banyu panase. Banyu panas alami sekang njero gunung lan mengandung belerang sing berkhasiat kanggo nambani penyakit kulit, monggoh rika pada sing gudigen utawa panuen njajal adus nang banyu panas pancuran pitu mbok menawa mari tur dadi ngganteng maning.

Lokasi pancuran pitu anane nang nduwur dewek, dadi nek arep maring nganah mandan rekasa, soale kudu mlaku munggah gunung, nek sing ora biasa mlaku adoh mesti keselen, dadi saran nek pengin maring Pancuran Pitu ngejak batir sing akeh dadi nek keselen bisa njaluk Gendong!

Curug Bayan Desa Ketenger

Ana maning sing kepenak nggo plesiran kie sedulur, jenenge Curug Bayan. Seliane Curug lan pemandangan alam sing asri, Curug Bayan sing anane nang Desa Ketenger kie wis digawe kaya Desa Wisata, ana penginapan sing digawe kaya Villa bisa kanggo nginep nang rika-rika pada, sensasine jan gawe tanduk pengin nginep maning. Suasanane asri, penginapane pas banget nang sandinge air terjun dadi suwara gemrujug banyune tekan njero kuping.

Banyu kaline jan bening ora eram, bisa langsung di kokop nang kaline, tapi takon disit olih langsung ora ya, mbokan jebul nang nduwur ana sing lagi nguyuh kan ora lucu.

Kebun Raya Baturaden

Nah kie siji maning lokasi wisata nang njero Baturaden, Kebun Raya Baturaden sing urung suwe di resmikna kie dadi tujuan Wisata nek pada maring Baturaden, terutama para keluarga sing pada gawa bocah-bocah men pada ngerti lan weruh langsung macem-macem wit-witan lan uga ana dolanan bocah.

Curug Bidadari

Nek dideleng sekang jenenge tah kayong Ayu yah? Bener banget, Curug siji kie emang cocok karo jenenge Bidadari, soale curug kie bener-bener gawe mlongo, gawe jatuh cinta lan pengin balik maning, asal aja di bojo!

Curug Bidadari cocok banget go sing seneng berpetualang, utawa sing seneng selfi uga bisa go spot Pre Wedding. Pokoke gawe tanduk pengin maring ngeneh terus nek wis sepisan ngambah Curug Bidadari.

Jane esih akeh lokasi-lokasi wisata nang daerah Baturaden, tapi jentike Ngadimin ora kuat suwe gole ngetik, soale kabeh artiken nang Ngapak.Net di ketik manual nang Ngadimin, mikir dewek, ngetik dewek, publish dewek. Dadi ya cukup semene bae yah sedulur, ngko nek ana wektu maning tek sambunge karo judul liane lan mbok menawa artikel kie bermanfaat tulung di sebarna maring kanca-kanca, nek ora bermanfaat jajal Ngadimin di email kepriwe deneng ora bermanfaat maring ngadimin@ngapak.net Kesuwun!

Ora Ngapak Ora Kepenak!

Facebook Comments

Tinggalna Balesan