Let’s travel together.

Wisata Owabong Waterpark Purbalingga

29

Purbalingga – Salah siji Kabupaten nang Jawa Tengah sing nduwe Pabrik Bulu Mata Palsu sing hasile di export maring luar negeri hebat mbok? Ora mung kue, mulai tanggal 25 April 2018 wingi Bandara Wirasaba utawa Bandara Jendral Sudirman resmi di gedekna lan arep di nggo Bandara umum sing kapasitase sekelas Bandara International. Dawane runway nang tahap pertama pembangunan yakue 1.600 meter, lan rencanane arep didawakna gutul 2.500 meter nang tahap berikute, maen pisan!

Wisata Owabong Waterpark Purbalingga

Ora mung kawasan Industri tok sing ana nang Purbalingga, tempat wisata juga mlarah-mlarah, salah sijine Wisata Owabong Waterpart Purbalingga sing ana nang desa Bojongsari. Apa laris? Ya laris, buktine sapet dibukak taun 2004 sing maune ambane mung 1Ha di ambani maning ngasi 4.8Ha. Bukti liane ya kae ngasi siki esih bukak, berarti kan payu mbok?

Wisata Waterpark nang Karesidenan banyumas kayane mung nang Purbalingga kie tok, dadi kang Kabupaten liane mesti akeh sing mampir, kaya sekang Banyumas, Banjarnegara, Pemalang. Pas lagi booming-boominge owabong, artis lokal Purbalingga Mas Dedy Pitak ngasi gawe lagu judule Owabong, jan maen mbok?

Apa Bae Sing Ana Nang Owabong?

Jenenge Waterpark ya isine banyu mbok? hahahaha Ya ora mung banyu tok maksude wa, ana wahana apa bae lho! Nang Owabong kie dibagi 4 Zona yakue Waterpark Utama, Sanggaluri, Cottage lan Usman Janati.

Nang Waterpark Utama rika bisa dolanan Banyu Ombak kaya nang laut, uga sing pinter nglangi bisa nglangi nang Kolam Renang Olympic sing digawe standar Internasional, nek ora pinter nglangi mending ora usah wa, mbok kemelem. Seliane kue, rika bisa dolanan Waterboom sing duwure 13 meter, cocok nggo sing ora bisa nglangi kie wa, tapi nek wedi duwur ya aja dolanan, mending bali bae.

Nang Zona Sanggaluri ana Taman Kelinci, Labirin, Umah Kaca ngasi Umah Gempa, rika bisa dolanan jonjang umpet nang Labirin kit esuk gutul Maghrib urung ketemu.

Nang Zona Cottage kie lewih maring wisata Outbond, misal nggo acara Gathering Perusahaan sing butuh nginep bisa, apa arep dolanan Arung Jeram utawa basa gaule Rafting ya bisa.

Nang Zona Usman Janati kie lewih maring dolanan bocah, kaya Taman Lampion, Bom-bom Car, karo Kereta Mini

Rika kencot nang Owabong? Ora usah puyeng, nang Owabong ya ana warung mangane utawa basa gaule Food Court sing nyediakna panganan-panganan maregi karo panganan nyeliliti ya ana.

Kayane semono disit ya inpormasi sekang Wisata Owabong Waterpark Purbalingga, nek misale ana kesalahan utawa basane Ngadimin sing ngawur tulung di ngapurane, soale Ngadimin ya menungsa urip tempate salah luput. Nek menawa artikel kie ana gunane, tulung di sebar maring kanca-kanca, nek ora ana gunane jajal di emailna kesalahane Ngadimin maring ngadimin@ngapak.net dadi Ngadimin bisa ndandani lupute. Kesuwun

Ora Ngapak Ora Kepenak

Facebook Comments

Tinggalna Balesan