KUB Kan Margasari karo Cinyawang Ulih Bantuan Berkat Sinergi Dewan Karo Pemerintah

Margasari – Dinas Ketenagakerjaan karo Perindustrian (Disnakerin) Kabupatèn Cilacap siki nyalurna bantuan piranti usaha karo nganakna pelatihan kanggo rong Kelompok Usaha Bareng (KUB) siji sing ana nang Desa Margasari karo sing ana nang Desa Cinyawang. Penyerahan bantuan gie dianakna dina Kemis, 14 November 2025, nang Sanggar Seni Ngudi Laras, Desa Margasari. Kec Sidareja

Rong klompok sing nampa bantuan yague KUB Karya Muda kan Desa Margasari, Kecamatan Sidareja, anggotane ana 10 wong, karo KUB Edi Lestari Furniture kan Desa Cinyawang, Kecamatan Patimuan, sing anggotane juga 10 wong. Bantuan gie tujuane kanggo nggawe tenaga kerja sing luwih trampil, mandiri, karo bisa ngopeni kebutuhan ekonomi keluargane dewek.

KUB Karya Muda, sing kegiatane nang desain grafis karo konten kreator, nampa bantuan kaya SD card 128 GB 3 unit, printer inkjet 1 unit, gimbal kamera 1 unit, kamera DSLR 1 unit, karo tripod kamera 1 unit.

Nek KUB Edi Lestari nampa piranti pertukangan kaya bor listrik 2 unit, bor duduk 1 unit, mesin pahat kayu 1 unit, gerenda tangan 4 inci 2 unit, mesin potong kayu 1 unit, mesin planer serut 1 unit, mesin las 1 unit, karo mesin trimmer 1 unit

Sakabehe bantuan gie asalé kan APBD Kab. Cilacap Tahun Anggaran 2025, liwat pokok-pokok pikiran (pokir) kan Ketua Fraksi PKB DPRD Cilacap, Saeful Musta’in.

Pengantar Kerja Ahli Madya Disnakerin, Pak Sutiknyo, SH, ngendika nek bantuan gie dadi salah siji usaha pemerintah kanggo nambah keterampilan karo kesempatan kerja wong-wong nang desa.

“Bantuan gie kan dana APBD Kabupaten Cilacap sing diupayakna Bapak Saeful Musta’in kanggo nambah keterampilan panjenengan kabeh. Muga-muga isa dienggo terus kanggo ngasilna duwit karo ndandani ekonomi keluargane,” ngendikane.

Pak Sutiknyo ya nambahna nek pemerintah siki terus ngupayakna supaya warga Cilacap ora kudu kerja adoh tekan luar negeri, utamane sing wadon.

“Nek isa kerja nang kéné, ngapa kudu meng luar negeri. Saben taun sing kerja metu malah nambah, sing akeh ya perempuan. Dadi bapak-bapak kéné kudu dadi bojo sing siaga, aja nganti bojomu kerja adoh, nang kowe nang umah mung dolanan manuk,” ujare karo guyonan khasé.

Pihak Disnakerin nerangna nek bantuan piranti karo pelatihan gie dadi salah siji cara supaya warga isa nggawe usaha karo ora gumantung kerja adoh.

Plt. Kepala Disnakerin juga pesen,
“Gunakna bantuan gie sing trep, aja nganti wis nei bantuan malah ora dimanfaatna. gie hasil jerih payah pemerintah karo usaha dewan, dadi kudu dihargai.”

Nang sesi wawancara, Pak Sutiknyo nerangna nek proses pemberian bantuan gie ora asal-asalan, nanging liwat proposal karo kebutuhan klompok. Dhèwèké juga nyorot nek industri konten kreator siki wis dadi peluang besar.

“Konten kreator siki wis dadi industri, isa ngasilna barang karo jasa kanggo nambah usaha mandiri,” ujare.
Ketua KUB Karya Muda, Mas Kapex, cerita nek klompoké awalé mung fokus nang desain grafis, nanging terus berkembang dadi konten kreator.

“Awalé mung desain grafis, terus bocah-bocah pada kepengin nggawe konten kreator. Kancaku padha nggawe film pendek karo wis ana sing tayang nang YouTube. Nanging merga alaté terbatas, dadi ora isa maksimal,” critane.

Dhèwèké juga nyebut nek KUB Karya Muda nduwé rencana nggarap konten musik karo ngedokumentasikna budaya nang desane.

“Dewek kepengin nggawe konten musik, soale wis ana basicé. Terus pengin ngedokumentasikna budaya nang kéné kanggo media konten,” tambahé.

Karo bantuan gie, Disnakerin ngarepna loro KUB gie isa berkembang, dadi usaha mandiri, karo nggawe lapangan kerja anyar nang tingkat desa, men ekonomi lokal nang Kabupaten Cilacap dadi tambah maju.