Pemerintah Kabupaten Cilacap nganggarna dana Rp5 miliar nggo ndandani gedung DPRD Cilacap.
Wis pada ngerti mbok, gedung DPRD Cilacap rusak bar dibakar massa nang demo sing rusuh pas tanggal 30 Agustus 2025 wingi. Akeh fasilitas, kaya lobi utama, ruang bagian keuangan, ruang fraksi, sampe ruang komisi, rusak serius.
Ora kur bangunane, perabotan kantor sampe perangkat elektronik be melu dijarah massa pas kejadian kerusuhane. Kondisi kiye ngganggu aktivitas pelayanan publik nang lingkungan DPRD Cilacap.
Bupati Cilacap Syamsul Auliya Rachman negasna, langkah ndandai arep dilakukna men pelayanan DPRD mbalek mlaku normal.
“Proses ndandani arep cepet-cepet dijalana supayane aktivitas DPRD bisa mbalek normal karo pelayanan publik ora terganggu,” omonge Syamsul, Minggu (14/9/2025).
Menurute Syamsul, pemerintah pusat juga sempat nawani bantuan pembiayaan tapine ana klasifikasi kerusakan sing kudu dipenuhi.
“Walaupun ana surat sekang pusat tapi kerusakan kiye masuk kategori ringan dadine lewih cepat nek ditangani karo (biaya) APBD,” jelasane Syamsul.
Pemkab Cilacap siki agi mbahas APBD Perubahan nggo mengakomodasi anggaran ndandani. Anggaran arep dijiotna lewat pergeseran pos lan ditambah nyesuana kebutuhan men perbaikan bisa segera dilakukna.
Bupati Syamsul negasna, kerugian miliaran rupiah akibat kerusuhan kudune bisa dimanfangatna nggo program kerakyatan.
“Nilai kerugian Rp5 miliar kuwe sebenere bisa dingo nggo program sing manfaat nggo masyarakat,” omonge.
Syamsul ngingetna meng masyarakat supaya ora gampang terprovokasi isu sing ora jelas kebenerane nang media sosial.
“Intine, aja gampang terprovokasi. Berita sing urung tentu bener aja giri-giri di-share (dibagikan) sedurunge disaring,” ujare Syamsul.
Sumber : Minggu, 14 September 2025 13:41 WIB
Penulis: Rayka Diah Setianingrum | Editor: rika irawati
