Tragedi ambruke gedung asrama putra Pondok Pesantren (Ponpes) Al Khoziny, Desa Buduran, Sidoarjo, nang Senin, 29 September 2025 sore, ndadikna duka sing jero.
Jumlah korban akibat ambruke bangunan PonPes terus nambah lan proses evakuasi tesih dilakukna. Tekan dina Selasa 30 September 2025 awan, total korban sing kecatet dadi 128 wong, telu diantarane ninggal.
Kepala Kantor SAR Surabaya, Nanang Sigit, ngomongke sekang total 128 korban, 91 wong bisa nylametna dewek, sementara 11 diantarane dislametna nang tim SAR gabungan.
“Korban sing luka wis digawa meng rumah sakit. Rinciane, 40 wong dirawat nang RSUD Sidoarjo, 53 wong nang RSI Siti Hajar, lan 3 wong dinyatakna meninggal dunia,” monge Nanang nang Selasa, 30 September 2025.
Tekan siki Tim SAR gabungan tesih nglakukna pencarian. Tapi mrioritasna mbuka jalur aman men evakuasi bisa mlaku maksimal.
Operasi penyelamatan kiye nglibatna sekang unsur Basarnas, BPBD Kabupaten Sidoarjo, BPBD Provinsi Jawa Timur, TNI, Polri, lan atusan relawan. Seliane fokus nggeleti korban, tim gabungan uga kudu mastikna keamanan struktur bangunan liane sing esih ngadeg men ora nimbulna bahaya liane nggo petugas nang lapangan.
Men pada ngerti, musibah kiye kedadian pas dina Senen 29 September 2025 sore sekitar jam 15.00 WIB. Pas kuwe santri agi pada persiapan sholat ngashar berjamaah nang lantai loro sing dingo mushola.
